మెగా డాటర్ నెక్ట్స్ సంగతి ఏంటో!

మెగా డాటర్ గా ఎన్నో అంచనాల మధ్య టాలీవుడ్ ఇండస్ట్రీలోకి అడుగుపెట్టిన నీహారికకు.. ఎంట్రీ సింపుల్ గానే వచ్చినా సక్సెస్ మాత్రం అందలేదు. ఒక మనసు మూవీ పరాజయం పాలవడం ఆమెను నిరుత్సాహపరిచింది. అయితే.. సినిమా రిజల్ట్ తేడా కొట్టినా.. నీహారిక చేసిన రోల్ కు.. ఆమె యాక్టింగ్ కు ప్రశంసలు రావడం మాత్రమే చెప్పుకోదగ్గ అంశం. మరిప్పుడు నీహారిక రెండో సినిమా చేస్తుందా చేయదా అనేదే పెద్ద ప్రశ్నగా మిగిలింది. 

ఒక మనసు రిలీజ్ కాక ముందే నీహారికకు కొన్ని ఆఫర్స్ వచ్చాయి. అయితే తొలిసినిమా రిజల్ట్ ను బట్టి.. ఆడియన్స్ రిసీవ్ చేసుకున్న పద్ధతిని బట్టి.. నెక్ట్స్ ప్రాజెక్ట్ విషయంలో నిర్ణయం తీసుకోవాలని ముందే నిర్ణయించారు.ఇప్పుడు సినిమా వచ్చింది.. జనాలు రిజల్ట్ కూడా ఇచ్చేశారు. నీహారికను ఓ శృతి హాసన్ టైపులో గ్లామర్ రోల్ లో ఊహించుకోవడం కుదరదనే విషయం ముందే చెప్పేశారు. సో.. కాసింత ఒద్దికైన పద్ధతైన పాత్రల్లో మాత్రమే మెగా డాటర్ కనిపించాల్సి ఉంటుందన్న మాట. అసలు గ్లామర్ అనే మాటే లేకుండా.. కెరీర్ కంటిన్యూ చేసిన తెలుగు హీరోయిన్ లయ ఒక్కతే.

ఇప్పుడు నీహారిక కూడా ఆమెను ఇన్ స్పిరేషన్ తీసుకుని కెరీర్ కంటిన్యూ చేస్తుందా అన్నదే క్వశ్చన్. మరోవైపు తండ్రి నాగేంద్ర బాబు మాత్రం తొలి సినిమాలో కూతురు కనిపించిన తీరును.. కనబరిచిన నటనకు అందరూ ప్రశంసిస్తుండడంతో సంతోషిస్తున్నాడు. ఇక ఒక మనసులో నీహారికకు కాస్ట్యూమ్స్ డిజైన్ చేసిన తల్లి మాత్రం నిరుత్సాహపడిందని అంటున్నారు. అందరూ కలిసి.. కెరీర్ కంటిన్యూ చేసే విషయంలో నిర్ణయం నీహారికకే వదిలేశారని తెలుస్తోంది. 

నాగబాబు వైఫ్ టేస్ట్ సూపర్

ఈ సీజన్ లో మెగా ఫ్యాన్స్ కి మోస్ట్ అవైటెడ్ మూవీ ఒక మనసు. మెగా డాటర్ నీహారిక హీరోయిన్ గా అరంగేట్రం చేస్తుండడంతో అంతా ఆసక్తిగా ఎదురుచూశారు. ఇప్పుడా రోజు రానే వచ్చింది. ఒక మనసు మూవీ చూసిన వాళ్లందరికీ ఓ విషయంలో మాత్రం మైండ్ బ్లాంక్ అయిపోయింది. కాటర్ చీరలు - చుడీదార్లతో ఒక అమ్మాయిని ఇంత అందంగా చూపించచ్చా అనిపించేసింది. 

ఒక మనసులో ప్రధానమైన హైలైట్.. నీహారిక లుక్ అని ఒప్పుకోవాల్సిందే. ప్రతీ ఫ్రేమ్ లోనూ ఎంతో అందంగా కనిపించింది మెగా డాటర్. ఎక్కడా ఆర్భాటం ఉండదు.. శారీస్ - చుడీదార్లు - పంజాబీ డ్రస్సులు.. అంతా నార్మల్ వేర్. అందుకు తగ్గట్లుగా మ్యాచింగ్ ఆర్నమెంట్స్. అందులో కూడా బంగారం ధగధగలు పెద్దగా కనిపించవు. ఫ్యాషనబుల్ ఫ్యాన్సీ వేర్ ని ఇంత అందంగా చూపించచ్చని నీహారిక నిరూపించింది. నిజానికి ఈ క్రెడిట్ అంతా నాగబాబు భార్య పద్మజ కొణిదెలకే దక్కుతుంది. 30-40 సన్నివేశాలకు గాను 60-70 డ్రస్సుల డిజైనింగ్. అన్నీ పద్మజ సొంత డిజైన్సే కావడం విశేషం. 

కూతురును సినిమా రంగానికి పరిచయం చేస్తూ ఆమె తీసుకున్న జాగ్రత్తలు అమోఘం అనాల్సిందే. నీహారిక తొలి సినిమాతోనే తెలుగు ప్రేక్షకుల మనసుల్లో నిలిచిపోనుందంటే.. అందుకు కారణం ఖచ్చితంగా నాగబాబు భార్యే. ఆమె స్టైలింగ్ - కాస్ట్యూమ్స్ తోనే సినిమాకి సగం కలర్ వచ్చేసింది. ఈ విషయంలో మాత్రం నాగబాబు వైఫ్ కి హ్యాట్సాఫ్ చెప్పాల్సిందే. 

పవన్ వేరు.. మేం వేరు కాదు-నిహారిక

మెగా ఫ్యామిలీ అంటే అందులో పవన్ కళ్యాణ్ కూడా భాగమేనని.. ఆయన వేరు తాము వేరు కాదని అంటోంది కొణిదెల నిహారిక. తాను కథానాయికగా పరిచయమవుతున్న ‘ఒక మనసు’ సినిమాను పవన్ చూస్తాడని ఆమె ఆశాభావం వ్యక్తం చేసింది. తమ ఫ్యామిలీ కోసం ‘ఒక మనసు’ ప్రివ్యూ షో వేయబోతున్నట్లు ఆమె వెల్లడించింది. ‘‘మా ఫ్యామిలీలో అందరి కోసం నా సినిమాను ప్రివ్యూ వేయాలనుకుంటున్నాం. పెదనాన్న చిరంజీవి తప్పకుండా ఆ షోకు హాజరవుతారు. ఫ్యామిలీ అంటే అందులో పవన్ బాబాయి కూడా ఉంటారు. ఆయన వేరు.. మేం వేరు కాదు. ఆయన కూడా నా సినిమా చూస్తారని ఆశిస్తున్నా. అందరూ నా పెర్ఫామెన్స్ గురించే ఏమంటారో అని ఆసక్తిగా ఎదురు చూస్తున్నా’’ అని నిహారిక చెప్పింది.

ఇక సినిమాల్లోకి రావాలనుకున్నపుడు తమ కుటుంబ సభ్యులు ఎలా స్పందించారో చెబుతూ.. ‘‘నేను సినిమాల్లోకి వెళ్లాలని స్థిరమైన నిర్ణయం తీసుకున్నాక ఇంట్లో వాళ్ళను సంప్రదించా. అందరూ ఇక్కడ పరిస్థితులు ఎలా ఉంటాయో.. హీరోయిన్లను కొందరు ఎలా చూస్తారో చెప్పారు. అయితే నా విషయంలో యాక్టింగ్ పరంగా నా కమిట్మెంట్ ఏంటో చెప్పా. అప్పుడు చిరంజీవి పెదనాన్న - కళ్యాణ్ బాబాయ్ కన్విన్స్ అయ్యారు. ఇష్టంగా చేస్తే ఎందులోనైనా విజయం సాధించవచ్చని.. నెగెటివిటీని పక్కనపెట్టి జాగ్రత్తగా సినిమాలు పాత్రలు ఎంపిక చేసుకోమని సలహా ఇచ్చారు. వాళ్ళిచ్చిన సపోర్టును ఎప్పటికీ నిలుపుకుంటూ. మంచి సినిమాలు చేస్తా” అని నిహారిక చెప్పింది.