జనసేన అధినేత పవన్ కల్యాణ్ ఏర్పాటు చేసిన "సీమాంధ్ర ఆత్మాభిమాన సభ" ముగిసిన అనంతరం చంద్రబాబు నాయుడు స్పందించారు. అసెంబ్లీ కమిటీ హాలులో తెదేపా శాసనసభాపక్షం సమావేశంలో ఉన్న చంద్రబాబు.. పవన్ కల్యాణ్ ప్రసంగం పూర్తయిన అనంతరం స్పందించారు. ఏ కాకినాడలో బీజేపీ సభ పెట్టి రాష్ట్రవిభజనకు పాల్పడి - నేడు ద్రోహం చేసిందో.. అక్కడే సభ ఏర్పాటు చేస్తున్నాను అని చెప్పి ఏర్పాటుచేసిన ఈ సభలో.. బీజేపీ పై పవన్ చేసిన విమర్శలపై బాబు స్పందిస్తూ... "పవన్ చేసిన వాదనను మనం అర్ధం చేసుకోవచ్చు" అని వ్యాఖ్యానించారు. ఇదే సమయంలో కేంద్రం ఇచ్చిన ప్యాకేజిని పాచిపోయిన లడ్డూలతో పోల్చడం ఏమాత్రం సబబు కాదని బాబు అన్నారు.
కాగా.. ఈ సభ కేవలం బీజేపీని - వెంకయ్యను తిట్టడానికే బీజేపీ వ్యతిరేకులు ఏర్పాటు చేసినదిగా భావిస్తున్నామని చెబుతున్నారు కొందరు బీజేపీ నేతలు. పవన్ కల్యాణ్ సభ అనంతరం జరిగిన చర్చా కార్యక్రమాల్లో పాల్గొన్న బీజేపీ నేతలు ఈ మేరకు కామెంట్స్ చేస్తున్నారు. బీజేపీ ఇచ్చిన ప్యాకేజీని పాచి లడ్డూలతో పోల్చడం సరికాదని అంటున్నారు. పవన్ మాటలు వింటుంటే.. ఎవరో స్పాన్సర్ చేసి బీజేపీని తిట్టించినట్లుగా ఉన్నాయని ఆయనేదో ఒక హిడెన్ అజెండాతో ఈ సభ పెట్టి బీజేపీని బద్నాం చేస్తున్నారని వ్యాఖ్యానించడం గమనార్హం.
